Lamborghini Urus SE 結合咗 Lamborghini 超跑嘅狂野性能同 SUV 嘅日常實用性。純電 EV 模式可以靜悄悄出入屋苑，唔怕嘈親鄰居；Sport 或 Corsa 模式時 V8 引擎咆哮聲浪澎湃，駕駛樂趣十足。標準配備後輪轉向同 360 度鏡頭，泊車 manageable。作爲一部可以日日揸嘅 Lamborghini，Urus SE 係一個好出色嘅超級 SUV 選擇。

Lamborghini Urus SE 係林寶堅尼嘅「超級 SUV (SSUV)」，定位為品牌旗艦 SUV 車型，亦係全球首款 PHEV 插電式混能超級 SUV。SE 版一個型號結合咗以往 Urus S（舒適豪華）同 Urus Performante（極致操控）兩種性格，無論係日常家庭使用定係賽道飛馳都同樣勝任。

Lamborghini Urus SE車廂中控台換上全新 12.3 吋大型觸控屏幕，運行與 Revuelto 相同嘅 HMI 操作介面。標準配備無線 Apple CarPlay、手機無線充電、360 度泊車鏡頭及前後泊車感應。車廂可選配全新雙色 Sportivo 運動風格或豪華 Sophisticated 風格座椅。車身顏色選擇超過 100 種。

Lamborghini Urus SE 版改用全新中置縱向電驅動扭力向量分配系統，以電子控制前後軸動力分配，替代以往機械式被動中央差速器，車尾亦改用電子限滑差速器 (E-diff)，反應更快更靈活。標準配備四輪轉向系統及主動式氣壓懸掛，升降範圍介乎 15mm 至 75mm。2.5 噸嘅車身過彎靈活如兩門跑車，操控功架比舊版 Urus Performante 更上一層樓。