Wuling Darion EV 採用 2+2+3 七座佈局，中排係兩張獨立「電動大班椅」，備有通風功能，舒適度極高。前、中排可以連接成卧床，中後排可透過中央走廊貫通。電趟門開啟角度闊大，配合高度適中嘅地台同門邊扶手，老人家同小朋友上落都好方便。

Wuling Darion EV 喺七座模式下，尾箱仍然有足夠空間擺放行李。將第三排座椅收摺後，容量可擴展至 1,202 公升，足夠擺放 12 個不同尺寸嘅行李喼。尾箱夠大，擺 BB 車、露營裝備或者大量購物都好夠用，非常實用。

Wuling Darion EV 配備 8.8 吋電子儀錶板同 12.8 吋觸控中控屏幕。其他標準配置包括雙電趟門、電動尾門、50W 手機無線充電、360 度泊車鏡頭、電動天窗、雙層隔熱玻璃、Auto Hold 電子手掣，以及 6 喇叭音響系統。可惜暫時未支援 Apple CarPlay。

Wuling Darion EV 配備 6 個安全氣囊、ESC 車身穩定控制系統，以及 ADAS 高級駕駛輔助系統。ADAS 功能包括主動式定速巡航、自動緊急煞車、車道偏離警告等 L2 級輔助駕駛功能，為出行提供周全保護。

雖然 Wuling Darion EV 車重超過 2.4 噸，但整體行車感覺線性爽快，起步敏捷，上斜路段都夠力。底盤紮實，前麥花臣、後多連桿懸掛調校偏向舒適，過彎穩定冇大傾側。提供 Eco、Standard、Sport 同個人化四種駕駛模式，動力回收有 Smart、Comfort、Standard、Strong 四級可調，仲可以調校制動力同軚感，可以自家配搭。稍嫌不足嘅係車廂隔音一般，高速行車時路噪比較明顯。

Wuling Darion EV 係上汽通用五菱旗下嘅純電動七座 MPV，定位為「實用家庭電動 MPV」。Darion EV 嘅賣點係超大空間、豐富設備、雙電趟門，以及極具競爭力嘅定價，目標係香港嘅大家庭、需要載客嘅商用用家，以及想由燃油 MPV 轉揸電動車嘅用家。