McLaren W1 係史上第二款合法街車用上「地面效應」技術。當佢進入「Race Mode」時，車身高度會降低，頭泵把嘅主動式翼片同車尾嘅「McLaren Active Long Tail」主動式長尾翼就會展開。呢個尾翼可以向後延伸 300mm，並透過 4 個摩打調整角度，產生高達 1,000 kg 嘅驚人下壓力。

McLaren W1 嘅 4.0 公升 V8 引擎係一副高轉機器，紅區直達 9,200 rpm。為咗營造激動人心嘅引擎聲，McLaren 嘅工程師用咗等長排氣歧管等技術，等轉速一路飆升嗰陣，引擎聲會好似交響樂咁去到尾段越嚟越激昂。而且，佢係純粹靠硬件調校，冇用到任何 artificial sound 假引擎聲。

喺呢個千匹年代，McLaren W1 堅持用後輪驅動，而且係純機械式液壓轉向，冇用電子轉向。佢嘅懸掛系統來自 F1 賽車技術，用咗 3D 打印嘅鈦合金部件，仲有極複雜嘅主動式底盤控制系統，確保 1,000 匹馬力能夠被精準及安全地駕馭。

個車廂設計非常賽車化，最特別係張固定式座椅，係直接鑲嵌喺碳纖維底盤上面嘅，唔可以前後移。點樣校到一個適合自己嘅駕駛姿勢？答案係：個駕駛艙嘅油門、剎車踏板同呔盤係可以電動調節，去就返你嘅位置。呢個設計源自旗艦賽車，有助減輕重量同令重心更低。

McLaren W1 嘅混能系統追求嘅係極致性能而非純電續航力。佢嘅電池容量得 1.384 kWh。雖然佢有純電模式，可以畀你靜悄悄地出入屋苑唔嘈到人，但純電續航力只有大約 2.6 公里。呢套系統嘅設計理念係確保賽道上時刻有足夠電量輔助加速，並且用摩打取代傳統嘅倒車檔。

McLaren W1 全球限量 399 部，基本車價係 200 萬英鎊（約 2,000 萬港元）起，未連 options 同稅。根據代理資料，香港獲分配 6 部。最重要嘅係，喺架車正式發表之前，全球配額已經全部沽清。所以，雖然香港有幸有 6 部配額，但而家基本上已經冇辦法喺市場上買到新車 quota 了。