Honda斥資234億港元建美國新廠！年產24萬輛，主攻混能車

【BitAuto資訊】Honda於11月9日（當地時間）宣布，將投資30億美元（約HK$234億）在美國俄亥俄州中部新建一座汽車工廠，同時對俄亥俄、阿拉巴馬及佐治亞州多處生產設施進行策略性投資，全面擴大美國混能車及引擎、混能系統產能。

新廠2029投產

新廠選址喺現有East Liberty及Marysville兩座工廠之間嘅土地，將成為Honda喺俄亥俄州第4座汽車廠、美國第9座汽車相關生產設施。規劃年產能24萬輛，預計2029年投產，仍待政府最終批准。

廠房將具備生產多種車型及動力嘅彈性，包括混能車、汽油車及純電車。Honda形容，新廠投產時將係全球最先進嘅工廠之一，配備領先嘅自動化、數據驅動技術及柔性生產系統。

連同新廠，Honda美國汽車年產能將提升至約130萬輛，北美總產能約190萬輛。

全新V6混能引擎

今次投資嘅重點之一，係阿拉巴馬汽車／引擎廠將擴建引擎生產線，為新生產嘅V6混動引擎（new V6 hybrid engine）做準備，同時提升產能。

廠方亦會更新Line 1嘅基礎設施，令呢條線可以生產現時只喺Line 2製造嘅Passport，提升車型調配彈性。阿拉巴馬廠今年秋季剛好迎來整車生產25周年。

混能系統產能暴增250%

俄亥俄州嘅Honda變速箱廠（TMP-O）已開始改造現有變速箱生產線，建成第二條混能系統生產線。未來幾年，俄亥俄州混動系統產能將提升250%。

TMP-O現時為美國製造嘅CR-V、Accord、Civic供應雙電機混能系統，並正為明年投產嘅新一代混能系統做準備，同時規劃為大型車型生產混能系統，並擔任該系統嘅牽頭工廠。

佐治亞州嘅TMP-G亦將於未來幾年開始為大型車生產新一代混能系統，需增設全新變速箱組裝線。

新四缸Atkinson引擎

俄亥俄州Anna引擎廠（全球最大Honda引擎廠）正改造現有生產線，生產新一代四缸Atkinson循環引擎，供未來北美製造嘅緊湊型及中型車使用。廠方亦正擴建零件整合中心，預計明年投入運作。

另外，加拿大Alliston廠亦會更新及改造生產設施，支持下一代混能及汽油車型，包括重新引入引擎製造。

日前Honda已宣布，計劃2030年前全球推出15款Honda及Acura混能車型，北美預計係多數車型嘅主要市場。今次投資正正係為呢個策略鋪路。廠方數字顯示，2025年美國售出嘅Honda及Acura汽車中，接近99%喺北美製造。

呢30億美元最值得留意嘅訊息，係Honda明確押注混能，唔係純電。新廠雖然保留純電生產彈性，但官方講到明係「滿足北美混能車需求增長」。

資料來源：Honda全球官網新聞稿，Honda美國新聞室公布

Web: http://www.bitauto.hk/

YouTube: http://www.youtube.com/@bitautohk

Facebook: https://www.facebook.com/bitautohongkong/