4 月 24 日，2026 北京車展正式開幕。長城汽車今次帶來了哈弗、魏牌、坦克 SUV、歐拉、長城炮、長城靈魂摩托六大品牌，近 60 輛展車集中亮相。從入門級新能源皮卡到四十多萬嘅豪華越野旗艦，涵蓋面相當寬。
本次參展主題定為「契約」，長城汽車總裁穆峰喺發佈會上強調，契約精神，係提速高質量發展嘅關鍵。長城汽車秉持實事求是嘅歸元哲學，真誠對待用戶與行業，構築紮實產品力、技術力與全球品牌力。契約精神所代表嘅信任，亦係商業世界最堅固嘅基石。站喺全球視野，長城汽車將致力歐洲市場，構建完整業務生態，並強調將力促「生態出海」，基於尊重與深耕，同當地用戶形成長期信任契約。
作為本次長城展台最受關注嘅新車之一，全新坦克 700 以「麒麟」為設計主軸，融合東方審美與硬派越野風格，主打中式豪華越野呢個細分定位。動力方面提供 3.0T Hi4-T 同 2.0T Hi4-Z 雙旗艦選擇，搭載「百萬級底盤」，並首次喺非承載車身車型上搭載 VLA 大模型，支援全場景 NOA 輔助駕駛，起售價 42.8 萬元。
哈弗猛龍 PLUS 喺外觀上延續方正硬朗路線，搭載後橋電控機械牙嵌式差速鎖，強化越野能力，超長續航係另一個賣點。4 月 18 日已開啓預售，價格 18.98 萬元起。七座版針對多口之家推出，預售價 19.38 萬元起，主打空間靈活性同智能化配置。魏牌 V9X 則係歸元 S 平台首款六座旗艦 SUV，定位 AI 豪華，預售價 37.18 萬元起，目標直指傳統豪華 SUV 市場。
長城炮 Hi4-T 覆蓋乘用同商用兩個版本，採用 Hi4-T 強越野電混架構，支援大功率外放電，長途越野續航焦慮同爬坡熱衰減問題係主要解決方向。搭載 Coffee OS 3 智慧座艙，車展現場預售價 14.98 萬元起，喺新能源皮卡市場入面價格相對積極。歐拉 5 今次帶來多動力版同運動款，運動款降低車身姿態、增加撞色設計，定位個性化消費群體，延續歐拉一貫嘅時尚精品路線。
技術展覽區係今次車展長城汽車嘅另一個重點。展示內容包括全新超級 V8 引擎、大量使用碳纖維嘅輕量化方案，以及中置動力佈局嘅首次亮相。呢啲技術目前偏向儲備性質，未來會逐步下放民用車型。喺智能化方面，長城歸元平台兼容五種動力形式，融合雙 VLA 大模型，Hi4 系列亦進化為覆蓋多場景嘅「動力家族」，Hi4-Z 採用功率分流技術，Hi4-T 主攻硬核越野，兩者形成互補。
目前，長城汽車全球用戶已超過 1600 萬，海外銷售渠道超 1500 間，累計海外銷量突破 200 萬輛。喺泰國、巴西建有 3 個全工藝整車生產基地，喺厄瓜多爾、巴基斯坦等市場設有 KD 工廠。坦克 SUV 系列已進入 30 多個國家同地區，喺中東市場有一定口碑積累。此次發佈會上，穆峰明確提到歐洲市場係下一步重點，構建完整嘅本地業務生態，而不只係簡單地賣車出嚟。
